آنا یاسا گئجیکمیش مادده لری ایله دوهتور حسن روحانی نین سئچگی وعده لری / یاسین حاجی زاده

 

باش سؤز

دعوت هفته لیک درگی سی

178 اینجی سای

دوشنبه 94.7.7 

اؤلکه میزده ایسلامی اینقیلابین ظفری ائلجه آنا یاسانین نیظاملانماسین دان 40 ایل کئچمیینه باخمایاراق، بو گونه قدر آنا یاسانین بعضی گئجیکمیش مادده لری آیریجا بو مادده لرین سوروندورمه چیلیک پروسه سینه شاهیدیک. اؤلکه میزین آنایاسیندا رسمی شکیل ده قید اولان بو مادده لرین، ایجرایی ضرورتینه باخمایاراق، اونون یؤنتیلمه سی ایناتچیل دیرنیش ایله قارشی قارشی دیر. قومیت حاقلاریلا ایلگیلی اولان 15 ایله 19 اونجو اصل لر جومله گئجیکن مادده لردن ساییلیر.  اؤلکه نین رسمی دیل ایله ایسکیریپتا سین آچیقلایان 15 اینجی مادده، آردیجا قومیت لرین اوخول و بیلیم یوردلاریندا دیل-ادبیات اؤیرتیم اؤزگورلویون ایضاح ائدرک، جمعی مئدیالار آیریجا مطبوعات ایچرسینده، عئینی اؤزگورلوک دن دانیشیر. 

قومیت لرین برابر حاقلاریندان دانیشان 19 اونجو اصل سه ، هر هانکی بیر قومیت، بویا، دیل تک واریانت لارا تعللوقون اوستونلوک اولمادیغینی وورغولاییر. 

آنجاق آنا یاسانی گؤزدن آتان توپلوملار، قومیت حاقلاری ایله ایلگیلی گئجیکمیش مادده لرین ایجراسین، آیریلیقچی اؤرگوت لرین گوجلنمه سی آیریجا سیاسی باخیم دان صرفه سیز ائلجه اؤلکه مصلحت لرینه زیانلی قیمت لندیریرلر. قومی حاقلارین گرچکلشمه سی باره دئیه ر موخالیف لر، ایسلامی اؤلکه ده یاشایان باشقا هویت لرین دیل-ادبیات اؤیرتیمین، فارسجا دیل-ادبیاتین ضعیفله مه سی آیریجا میللی بیرلیگه تهلوکه لی، اولدوغونا دایانیرلار. 

ایصلاحات دؤولتینین ایش اوسته گلمه سی ایله بیرگه، گئجیکن آنا یاسا مادده لری قونوسو، طلب باشلیق لارینی ایشغال ائدیب، قومیت لر حاقلاری ایله ایلگیلی اولان ایسلامی شورالارین قورولماسینی گؤزده آلاراق، یئنه قومیت حاقلاری ایله ایلگیلی اساس مادده لرین ایجراسی حاقدا بیر آددیم آتیلماییب، شیفاهی سوییه قدرینده ده طرح اولونمادی لار. 

ایصلاحات دؤنمی نین قورتولوشو ائلجه محمود احمدی نژادین جومهور باشقانلیق سوره سینده، قومیت حاقلاری ایله ایلگیلی طلب لر تاماما پارلیمان ایله دؤولتین تارتیشما سیاهه سین دن کنارا قویولوب، قومی، کولتورل، سیاسی فاعاللار آرتیقجا سیخینتی لارا معروض قالدیلار، باغلانان درنک لر ایله بیرگه ایختیناق فضاسی آرتیقجاسینا، تکجه هویتی قونولار چئوره سینده یوخ، بوتونلوکجه سیاسی،کولتورل آلانلار اوزره کؤلگه سالدی. 

محمود احمدی نژادین جومهور باشقانلیق دؤنمی نین سون آلیب، حسن روحانی نین تدبیر دؤولتینین ایش اوسته گلمه سی، سیاسی فضانین نیسبی شکیلده آچیلیشی ایله بیرگه گئجیکمیش آنا یاسا مادده لرینین ایجرا طلب لری حاقدا یئنی بیر آلان آچیب، سؤیلم قورماغا چالیشدی. سیاسی، ایقتیصادی،کولتورل آیریجا قومیت حاقلاری باره ده گرکن گلیشمه لری آچیقلایان بو سؤیلم، بو گلیشمی یاراتماق باره ده آردیجیل سؤز وئریردی.

 آردیجا اعتدال کاندیداسی نین قومی حاقلارلا ایلگیلی اوچونجو نؤمره لی بیلدیری سی، اعتدال سؤیلمی ائلجه بو سؤیلمین کاندیداسینا قومی منطقه لرده محتشم سیغیناجاق دوزنلییب، سئچگی لره ساوونولماسینا گرکلی بیر ندن یاراتدی. 

آنجاق ایکی ایل اؤنجه چاغداش جمهور باشقانی، دوهتور حسن روحانی نین سئچکی لر اؤنو اورمویا گلیشی آیریجا قومی حاقلارین طلب ائدن گنج لرین بو آلاندا توپلاندیغین دان ایکی ایل دن آرتیق کئچیر، تورکجه دیل -ادبیات آکادئمیا آچیلیشی، وطنداشلیق مدنی حاقلار ثوبوتو ائلجه اورمو گؤلون احیاسی تک سئچگی وعده لری، آذربایجان مدنی، کولتورل، طبیعت فاعاللارینا قارشی، اومود دولو یئنی بیر آچیشقا آچیب بدیعی حاقلار طلبینده آرتیقجا جوشقولاندیردی. یورغون آنجاق اومودلو فاعاللارین باخیشی، دوهتور روحانی نین سئچکی لرده ظفر قازاندیق دان سونرا، آرتیقجا جومهور باشقانی نین داورانیشلارینا تیکیلیب، علی یونسی نین قومیت حاقلاری ایله باغلی اؤزل یاریدیمچی اولاراق سئچیمی بو اومودو داها دقیق لندیردی. 

آذربایجان تورکجه دیل - ادبیات آکادئمییاسی، آذربایجان تورکجه سینین اؤیرتیمین دن عیبارت اولان، دوهتور روحانی نین سئچگی وعده لری، یؤنلمه دن اؤنجه سیخ موخالیفت لری قارشیلاشدی نئجه کی قومیت حاقلاری ایله باغلی قونولاری برتانیا قصدی قیمت لندیرن فتح الله مجتبی ای، بو آلان فاعال لارین همین دؤولتین خرریب عامیل لری تانیتدیردی.   

آنجاق جمهور باشقانلیق قورومونون آنا یاسا گئجیکمیش مادده لری باره ده، یؤنتیم گوجلرینی گؤزده آلیب، 93 اوچونجو ایلدن بو ماده نین کوردوستان ایالتینده یؤنلمه سی، بو گون سه سنندج بیلیم یوردوندا کوردحه دیل-ادبیات یئرلشمه سینه سیغیناراق، اینحیصارچی توپلوم لارین موخالیفت سببی ایله بایکوت آرخاسینا کئچیب باسدیرلماسی گؤزلنیلمیر.آنجاق آذربایجان ایله کوردوستانین قومیت باخیمندان عئینی دوروم دا اولدوغونو گؤزده آلاراق، بو آذربایجان ایالت لرینده همین مادده ل ر یؤنتیمی، تکجه تبریز شهرینین آذربایجان کولتور ایله ادبیات مرکزی نین آچیلیشینا کیفایت لنیب.  

اؤزل کؤمکچی قدرینه یئندیریلن قومیت لر حاقدا یاردیمچی مقامی، چوخ زامانلارسا قومی حاقلاری ساوونماق عوضینه، اینحیصارچی توپلولار ایله بیرگه لنیب، طلبچی فاعاللار ایله توپلوم لارا سالدیریر.  هله قدر ساغلام دوروما گلمین اورمو گؤلو، گله جک آدای لارین، رئکلام آلانینا چئوریلیب. " اورمو گولو ساغلاملاشدیرما مرکزی " ایسه، سون زامانلاردا داها آرتیق گؤزده اولدوغونو گؤزده آلاراق، آرتیقجا آراشدیریچی یوخ بلکه رئکلامیک یون لرایله چیخیش ائدیر.

 سئچگی لرین بیراینجی دؤرونده محبوبیت واسیطه سی ایله باشقا آدای لارا غالیب گلن دوهتور حسن روحانی، سیرا سورونلار ایله اوزلشمکده دیر، ایکی ایل یئنتیملیک سوره سیندن اؤتن دوهتور روحانی، جامعه ایچرسی، دقیق وضعیت ده قومی ایالت لر ایچرسینده، پاپولارلیق ائنیشی ایله اوزلشیب. بو ائنیشین ندن لرین آرتیقجا آردی توتولمایان، آنجاق اؤنجه لر قومی ایالت لر سس (رای) لرینی، صاندیقلارا ائدیرن، سئچگی وعده لرینده آراماق اولار.

  اومید وار 6 دونیالیق قودرتله آنلاشما، آیریجا آغیر دوروملو خاریجی سیاست کئچیت لرین اوغورلو آتلاتدیق دان سونرا، ایسلامی پارلیمان ائلجه جمهور باشقانلیق سئچکی لرینین اؤنده اولدوغونو گؤزده آلیب، ایش یؤنلرین اطرافلی آراشدیراراق، گئجیکمیش آنایاسا مادده لری ائلجه قومیت لرله ایلگیلی سئچگی وعده لرینین گرچکلشمه سی یولدا آددیملاییب، نوکلر انرژی قونوسولا خاریجی سیاست آلانلاری تک آردیجیللیق ایله وورغوسون ثبوط ائدیب، اعتدال سؤیلمینه 20 میلیون سسین اوغورلو جاوابلاندیرسین.